Шүүгч хараат бус байж, гагцхүү хуульд захирагдана. Ерөнхийлөгч, Ерөнхий сайд, Улсын Их Хурлын ба Засгийн газрын гишүүн, төр, нам, олон нийтийн бусад байгууллагын албан тушаалтан, иргэн хэн боловч шүүгчээс шүүн таслах үүргээ хэрэгжүүлэхэд хөндлөнгөөс оролцож болохгүй. Шүүгчийн хараат бус, шүүхийн бие даасан байдлыг хангах зорилгоор Шүүхийн ерөнхий зөвлөл ажиллана. Шүүхийн ерөнхий зөвлөл шүүх, шүүгчийн шүүн таслах ажиллагаанд оролцохгүйгээр, гагцхүү хуульчдаас шүүгчийг шилж олох, эрх ашгийг нь хамгаалах зэрэг шүүхийг бие даан ажиллах нөхцөлөөр хангахтай холбогдсон үүргийг биелүүлнэ. Шүүхийн ерөнхий зөвлөлийн зохион байгуулалт, үйл ажиллагааны журмыг хуулиар тогтооно. / Монгол Улсын Үндсэн хуулийн 49 дүгээр зүйл/
Шүүгч, ажилтнууд Улс, Орон нутгийн онцгой комисст 44 сая төгрөг хандивлалаа

Шүүгч, ажилтнууд Улс, Орон нутгийн онцгой комисст 44 сая төгрөг хандивлалаа

2020-03-18   |   Админ   |  

     Монгол Улсын анхан болон давж заалдах шатны шүүхийн шүүгч, шүүхийн захиргаа болон үйлчилгээний ажилтнууд Улсын онцгой комисс, Орон нутаг дахь онцгой комисст 43.812.556 төгрөг хандивлалаа.

     Коронавируст халдвар (COVID-19)-аас урьдчилан сэргийлэх арга хэмжээнд сайн дураараа нэг өдрийн цалингаа хандивлахыг Шүүхийн ерөнхий зөвлөлөөс шүүгч, шүүхийн захиргааны ажилтнуудад уриалсан билээ.

     Иргэдийн амь нас, эрүүл мэндийг сахин хамгаалахад хүчин зүтгэж, халдварын эрсдэлтэй бүсэд ажиллаж буй эмнэлэг, онцгой байдал, цагдаа, гааль зэрэг мэргэжлийн байгууллагуудын ажилтан, алба хаагчдад зориулан нэг өдрийн цалингаа хандивлах уриалгыг анхан болон давж заалдах шатны шүүхийн 241 шүүгч, 637 ажилтан дэмжлээ.

     Шүүгч, шүүхийн захиргааны болон үйлчилгээний ажилтнууд сайн дурын хандивынхаа 29.544.904 төгрөгийг Улсын онцгой комисст буюу Онцгой байдлын ерөнхий газрын төрийн сангийн 100900031405 тоот дансанд шилжүүлжээ. Мөн 13.707.652 төгрөгийг орон нутаг дахь Онцгой комисст тус, тус хандивласан байна.

                      Сайн үйлс бүхэн дэлгэрэх болтугай.

Шүүхийн хэвлэл мэдээллийн хэлтэс